Inflacioni prej 2.1 për qind pritet t'i sjellë buxhetit 5.4 miliardë lekë më shumë nga tatimet dhe doganat në vitin 2027.

Rritja e çmimeve pritet të kthehet në një burim të konsiderueshëm të ardhurash shtesë për buxhetin e shtetit gjatë vitit 2027. Sipas parashikimeve të Ministrisë së Financave, indeksimi me inflacionin prej 2.1% do të gjenerojë rreth 5.4 miliardë lekë, ose afërsisht 58 milionë euro, të ardhura shtesë nga tatimet dhe doganat, kryesisht përmes Tatimit mbi Vlerën e Shtuar (TVSH) dhe ndikimit të çmimeve në vlerën e importeve.

Meqenëse TVSH-ja llogaritet si përqindje e çmimit të mallrave dhe shërbimeve, rritja e çmimeve sjell automatikisht edhe një vlerë më të lartë të tatimit të paguar për të njëjtën sasi produktesh. Për rrjedhojë, buxheti mund të arkëtojë më shumë të ardhura edhe në rastet kur konsumi nuk shënon rritje.

Ky efekt krijon të ardhura shtesë për financat publike, por njëkohësisht rëndon mbi fuqinë blerëse të familjeve, të cilat duhet të shpenzojnë më shumë për të blerë të njëjtat mallra dhe shërbime.

Të ardhurat nga tatimet dhe doganat pritet të arrijnë në 583.5 miliardë lekë

Sipas dokumentit të parashikimit të të ardhurave për vitin 2027, Ministria e Financave pret që arkëtimet nga tatimet dhe doganat të arrijnë në 583.5 miliardë lekë, nga 536.2 miliardë lekë të planifikuara për vitin 2026.

Rritja e parashikuar është rreth 46.9 miliardë lekë, ose 8.7% më shumë krahasuar me planin e vitit aktual.

Nga kjo shtesë, rreth 5.4 miliardë lekë pritet të vijnë drejtpërdrejt nga efekti i inflacionit. Kjo shumë përfaqëson afërsisht 11.5% të rritjes së përgjithshme të planifikuar të të ardhurave nga tatimet dhe doganat.

Ndikimi i inflacionit është veçanërisht i ndjeshëm për produktet dhe shërbimet që konsumohen rregullisht, pasi familjet kanë më pak mundësi të reduktojnë shpenzimet për nevojat bazë.

Rritja ekonomike dhe inflacioni sjellin 18.8 miliardë lekë më shumë

Përveç ndikimit të çmimeve, një pjesë e konsiderueshme e të ardhurave shtesë pritet të gjenerohet nga zgjerimi i aktivitetit ekonomik.

Sipas përllogaritjeve të Ministrisë së Financave, rritja ekonomike, e marrë në nivelin 2.73% për efekt të parashikimit të të ardhurave, pritet të kontribuojë me rreth 13.3 miliardë lekë në arkën e shtetit gjatë vitit 2027.

Ndërkohë, efekti i indeksimit me inflacionin prej 2.1% llogaritet në 5.4 miliardë lekë. Të marra së bashku, rritja ekonomike dhe inflacioni parashikohet të gjenerojnë rreth 18.8 miliardë lekë të ardhura shtesë, ose afërsisht 40% të gjithë rritjes së planifikuar të arkëtimeve nga tatimet dhe doganat.

Ndryshe nga rritja ekonomike, e cila lidhet me zgjerimin e prodhimit, konsumit dhe aktivitetit të bizneseve, inflacioni mund të rrisë arkëtimet nominale të buxhetit edhe pa një shtim të sasive të mallrave dhe shërbimeve që qarkullojnë në ekonomi.

Kjo do të thotë se një pjesë e rritjes së të ardhurave tatimore nuk buron nga zgjerimi real i aktivitetit ekonomik, por nga çmimet më të larta mbi të cilat llogariten detyrimet fiskale.

Strategjia Afatmesme e të Ardhurave, 10 miliardë lekë shtesë në 2027

Përveç inflacionit dhe rritjes ekonomike, qeveria parashikon të sigurojë të ardhura shtesë edhe përmes masave fiskale dhe përmirësimit të administrimit tatimor.

Sipas Ministrisë së Financave, masat e Strategjisë Afatmesme të të Ardhurave pritet të kontribuojnë me rreth 10 miliardë lekë në vitin 2027.

Kjo strategji synon zgjerimin e bazës tatimore, kufizimin e informalitetit dhe evazionit fiskal, përmirësimin e mbledhjes së detyrimeve dhe rritjen e efektivitetit të administratës tatimore.

Një tjetër shumë prej 4.4 miliardë lekësh parashikohet të sigurohet nga masat fiskale buxhetore të vitit 2027, ndërsa masat e ndërmarra në vitet e mëparshme pritet të japin një efekt shtesë prej 1.4 miliardë lekësh.

Ministria e Financave ka përfshirë gjithashtu rreth 12.8 miliardë lekë të ardhura nga korrigjime të bazuara në faktorë të tjerë.

Çmimet më të larta rrisin arkëtimet, por ulin fuqinë blerëse të familjeve

Parashikimet për vitin 2027 tregojnë se inflacioni do të vijojë të ndikojë jo vetëm në shpenzimet e qytetarëve, por edhe në nivelin e të ardhurave që mbledh buxheti i shtetit.

Rritja e çmimeve të produkteve dhe shërbimeve sjell një rritje të shumës së TVSH-së së paguar nga konsumatorët, edhe kur sasia e konsumuar mbetet e pandryshuar. Një efekt i ngjashëm mund të shfaqet edhe në arkëtimet doganore, për shkak të ndryshimit të vlerës së importeve.

Për familjet, kjo nënkupton shpenzime më të larta për të njëjtat nevoja, ndërsa për buxhetin krijon një burim shtesë financimi.

Nga rritja e përgjithshme e planifikuar e të ardhurave nga tatimet dhe doganat, prej rreth 46.9 miliardë lekësh, 5.4 miliardë lekë pritet të sigurohen vetëm nga efekti i inflacionit, duke përfaqësuar rreth 11.5% të shtesës së parashikuar për vitin 2027.

Burimi: Monitor